ایرانی حملوں کے بعد اسرائیلی عوام ملک چھوڑنے پر مجبور

 

ایرانی حملوں کے بعد اسرائیلی عوام ملک چھوڑنے پر مجبور، سمندری راستے سے قبرص کی جانب روانگی

ایران اور اسرائیل کے درمیان جاری شدید کشیدگی کے نتیجے میں درجنوں اسرائیلی شہری اور غیرملکی افراد اسرائیل چھوڑ کر جا رہے ہیں۔ بین الاقوامی ذرائع کے مطابق حالیہ ایرانی میزائل حملوں کے بعد، خوف و ہراس کے باعث سینکڑوں افراد نے اسرائیل سے انخلا شروع کر دیا ہے۔

چونکہ اسرائیلی فضائی حدود فی الحال بند ہیں، اسی لیے متاثرہ افراد چھوٹی کشتیوں کے ذریعے سمندری راستے سے قبرص کا رخ کر رہے ہیں۔ رپورٹوں کے مطابق، حیفہ سے روانہ ہونے والی ان کشتیوں میں سفر کرنے کے لیے مسافروں سے فی کس 800 امریکی ڈالر وصول کیے جا رہے ہیں۔

ذرائع کا کہنا ہے کہ انخلا کی یہ لہر جاری ہے، اور مزید افراد محفوظ مقامات کی تلاش میں نکل رہے ہیں۔ اسرائیلی حکومت کی جانب سے فضائی پروازوں پر تاحکم ثانی پابندی کے بعد عوام کے پاس متبادل سفری راستے محدود ہو گئے ہیں۔