جنگ کے آخری دنوں میں ایران نے اسرائیل کی بہت مار لگائی، امریکی صدر ڈونلڈ ٹرمپ

 

ایران اور اسرائیل کے درمیان سیز فائر پر ٹرمپ کا بیان، فردو پر حملے کے نتائج سے مطمئن

امریکی صدر ڈونلڈ ٹرمپ نے کہا ہے کہ ایران نے جنگ کے آخری دنوں میں اسرائیل کو سخت نقصان پہنچایا۔ ان کا کہنا تھا کہ ایران کے بیلسٹک میزائلوں نے اسرائیلی علاقوں میں خاصی تباہی مچائی اور کئی عمارتیں متاثر ہوئیں۔

نیدرلینڈز کے شہر دی ہیگ میں نیٹو اجلاس کے دوران گفتگو کرتے ہوئے ٹرمپ نے دعویٰ کیا کہ امریکی حملے کے بعد فردو کی جوہری تنصیب مکمل طور پر تباہ ہو چکی ہے۔

انہوں نے میڈیا رپورٹس کو مسترد کرتے ہوئے کہا کہ بعض ادارے امریکی فوجی کارروائی کو ناکام دکھانے کی کوشش کر رہے ہیں۔ ٹرمپ کا کہنا تھا کہ ایف بی آئی انٹیلیجنس معلومات کے لیک ہونے کی تحقیقات کر رہی ہے۔

صدر ٹرمپ نے خبردار کیا کہ اگر ایران دوبارہ یورینیم افزودگی کا عمل شروع کرے گا تو امریکا فوجی کارروائی کرے گا۔ ان کا مزید کہنا تھا کہ سیز فائر مؤثر انداز میں جاری ہے اور اسرائیلی فضائیہ میری درخواست پر ایران کی فضائی حدود سے واپس آ چکی ہے۔

غزہ کے حوالے سے بھی امریکی صدر نے اہم پیش رفت کا عندیہ دیا ہے۔