بھارت کی چین سے سرحدی تنازع مستقل حل کرنے کی خواہش

 

بھارت کی چین سے سرحدی تنازع مستقل حل کرنے کی خواہش

 شنگھائی تعاون  تنظیم (SCO) کے اجلاس کے دوران   بھارت نے چین سے سرحدی تنازع مستقل طور پر حل کرنے کی خواہش کا اظہار کر دیا۔ یہ بیان بھارتی وزیرِ دفاع کی جانب سے دیا گیا جنہوں نے چینی ہم منصب سے ملاقات میں سرحدی کشیدگی کو کم کرنے پر زور دیا۔

ملاقات کے دوران بھارتی وزیرِ دفاع نے کہا کہ دونوں ممالک کے درمیان تنازع کو باقاعدہ روابط، کشیدگی میں کمی کے اقدامات، اور ایک منظم روڈ میپ کے ذریعے حل کیا جانا چاہیے۔ انہوں نے واضح کیا کہ سرحدی حد بندی کے مسئلے پر موجودہ میکنزم کو دوبارہ فعال بنانا وقت کی ضرورت ہے تاکہ دونوں ممالک اچھے ہمسائیگی تعلقات کی جانب بڑھ سکیں۔

بھارتی وزیر نے باہمی مفادات کے حصول، اعتماد سازی، اور مستقل رابطوں کی اہمیت پر زور دیتے ہوئے کہا کہ پرامن سرحدی تعلقات دونوں ملکوں کے لیے فائدہ مند ہوں گے۔

یہ پیش رفت ایک ایسے وقت میں سامنے آئی ہے جب بھارت اور چین کے درمیان کئی سالوں سے لداخ کے سرحدی علاقوں میں تناؤ برقرار ہے، اور متعدد بار دونوں افواج آمنے سامنے آ چکی ہیں۔

دوسری جانب ماہرین اس اقدام کو خطے میں استحکام کی کوششوں کے طور پر دیکھ رہے ہیں، تاہم ان کا کہنا ہے کہ حقیقی تبدیلی کے لیے ٹھوس عملی اقدامات ناگزیر ہیں۔