میں نے خامنہ ای کو بچایا، انہوں نے شکریہ تک نہیں ادا کیا: ڈونلڈ ٹرمپ

 

میں نے خامنہ ای کو بچایا، انہوں نے شکریہ تک نہیں ادا کیا: ڈونلڈ ٹرمپ

امریکی صدر ڈونلڈ ٹرمپ نے ایرانی قیادت پر تنقید کرتے ہوئے دعویٰ کیا ہے کہ انہوں نے ایران کے سپریم لیڈر آیت اللّٰہ علی خامنہ ای کو بچایا، مگر اس کے بدلے انہیں شکریہ تک نہیں کہا گیا۔

اپنے حالیہ بیان میں ڈونلڈ ٹرمپ کا کہنا تھا کہ انہیں بخوبی علم تھا کہ ایرانی سپریم لیڈر کہاں چھپے ہوئے تھے، مگر انہوں نے دانستہ طور پر حملہ نہیں کیا۔ ان کے مطابق، "میں جانتا تھا کہ خامنہ ای کہاں ہیں، لیکن میں نے انہیں بچایا۔"

ٹرمپ نے ایرانی قیادت کے حالیہ بیانات پر بھی برہمی کا اظہار کیا۔ ان کا کہنا تھا کہ آیت اللّٰہ خامنہ ای کی جانب سے جنگ میں فتح کا دعویٰ بے بنیاد اور غیر منطقی ہے۔ "ایماندار شخص کو جھوٹ بولنا زیب نہیں دیتا،" ٹرمپ نے کہا۔

انہوں نے کہا کہ ایران کو بین الاقوامی برادری کا حصہ بننے کے لیے سنجیدہ رویہ اختیار کرنا ہوگا، بصورت دیگر وہ خود کو مزید تنہائی اور بحران میں پائیں گے۔

ٹرمپ نے مزید بتایا کہ وہ حالیہ دنوں میں ایران پر عائد پابندیاں نرم کرنے اور دیگر اصلاحی اقدامات پر کام کر رہے تھے، مگر ایرانی قیادت کے غصے اور نفرت سے بھرے بیانات نے اس عمل کو روک دیا۔

سابق امریکی صدر نے یہ بھی دعویٰ کیا کہ ایران کی ایٹمی تنصیبات پر گزشتہ ہفتے امریکا کی بمباری نے ان میں شدید نقصان پہنچایا، اور وہ چاہتے ہیں کہ عالمی معائنہ کار ان تنصیبات کا خود جائزہ لیں۔

ڈونلڈ ٹرمپ نے یہ بھی کہا کہ ایرانی قیادت خفیہ طور پر ان سے ملاقات کی خواہشمند ہے، اور وہ جلد ایران کے سپریم لیڈر کے اُس بیان کا بھی جواب دیں گے جس میں خامنہ ای نے قطر میں امریکی فوجی اڈے پر حملے کو "امریکا کے چہرے پر تھپڑ" قرار دیا تھا۔