غزہ میں اسرائیلی بمباری جاری، مزید 64 فلسطینی شہید، امدادی کارکن بھی نشانہ

 

غزہ میں اسرائیلی بمباری جاری، مزید 64 فلسطینی شہید، امدادی کارکن بھی نشانہ

غزہ: اسرائیلی جارحیت کے نتیجے میں غزہ میں صبح سے اب تک مزید 64 فلسطینی شہید ہو چکے ہیں، جن میں وہ 9 افراد بھی شامل ہیں جو امداد حاصل کرنے کے لیے قطار میں کھڑے تھے۔

امدادی مراکز پر کی گئی فائرنگ سے اب تک شہداء کی مجموعی تعداد 743 تک جا پہنچی ہے۔ اس حملے میں دو امریکی امدادی کارکن بھی زخمی ہوئے جو خوراک تقسیم کر رہے تھے۔

اسرائیلی فوج نے الزام عائد کیا ہے کہ امریکی کارکن حماس کی کارروائی میں زخمی ہوئے، تاہم آزاد ذرائع اس کی تصدیق نہیں کرتے۔

اسرائیلی فوج نے شمالی غزہ میں جاری جھڑپوں کے دوران اپنے دو فوجیوں کی ہلاکت کا اعتراف بھی کر لیا ہے۔

ادھر برطانوی حکومت نے انسداد دہشت گردی قانون کے تحت فلسطین کے حامی تنظیم فلسطینی ایکشن گروپ پر پابندی عائد کر دی ہے، جس پر انسانی حقوق کے حلقوں میں تشویش پائی جاتی ہے۔