بھوک، بےبسی اور بربریت — خان یونس میں امداد کے انتظار میں 20 فلسطینی شہید

 

بھوک، بےبسی اور بربریت — خان یونس میں امداد کے انتظار میں 20 فلسطینی شہید

غزہ کے علاقے خان یونس میں آج صبح ایک اندوہناک سانحہ پیش آیا، جہاں امداد کے لیے جمع بھوکے فلسطینیوں کے ہجوم پر ظالمانہ شیلنگ اور مرچوں کا اسپرے کیا گیا۔ امریکی امدادی مرکز کے باہر پیش آنے والے واقعے میں 20 فلسطینی شہید ہوگئے جن میں 19 افراد بھگدڑ میں کچلے گئے جبکہ ایک نوجوان کو چاقو مار دیا گیا۔

امریکی حمایت یافتہ تنظیم جی ایچ ایف نے دعویٰ کیا کہ ہجوم میں موجود مسلح افراد نے بدنظمی کو ہوا دی، تاہم عینی شاہدین کے مطابق فلسطینی عوام بھوک کی شدت سے نڈھال ہو کر امداد کے لیے نکلے تھے اور ان پر حملہ کر کے زندگی کی آخری امید بھی چھین لی گئی۔

ادھر اسرائیل نے ظلم کی نئی مثال قائم کرتے ہوئے غزہ کے شہریوں پر سمندر تک جانے پر بھی مکمل پابندی لگا دی۔ فلسطینیوں نے شدید احتجاج کرتے ہوئے کہا:

“ہماری زمین، ہمارے گھر، ہماری روزی پہلے چھینی گئی، اب سمندر جیسا آخری سہارا بھی چھین لیا گیا ہے، بھوک سے مر جائیں گے مگر ہار نہیں مانیں گے۔”

گزشتہ 24 گھنٹوں میں غزہ پر جاری اسرائیلی حملوں میں شہادتوں کی تعداد 81 ہو چکی ہے۔ مسلسل بمباری کے باعث اسپتالوں میں ایندھن اور ادویات ختم ہو چکی ہیں، معصوم بچوں اور خواتین کا کوئی پرسانِ حال نہیں۔