حماس نے غزہ جنگ بندی پر مذاکرات کے لیے آمادگی ظاہر کر دی

 

حماس نے غزہ جنگ بندی پر مذاکرات کے لیے آمادگی ظاہر کر دی

فلسطینی مزاحمتی تنظیم حماس نے اعلان کیا ہے کہ وہ غزہ میں جنگ بندی کے لیے فوری مذاکرات شروع کرنے کے لیے تیار ہے۔ تنظیم نے اپنے ایک بیان میں کہا کہ اس نے امریکی ثالثی میں پیش کیے گئے جنگ بندی منصوبے پر اپنا ’مثبت جواب‘ ثالثوں کو دے دیا ہے۔

حماس کا کہنا ہے کہ وہ جنگ بندی کے منصوبے پر عملدرآمد کے طریقہ کار پر بات چیت کے لیے فوری تیار ہے۔ برطانوی خبر رساں ایجنسی کے مطابق اسرائیل کو حماس کا جواب موصول ہو چکا ہے۔

ایک فلسطینی عہدیدار نے اس پیشرفت پر بات کرتے ہوئے کہا ہے کہ حماس کا ردِعمل مثبت ہے اور امید کی جا رہی ہے کہ اس سے فریقین کے درمیان جنگ بندی معاہدے تک پہنچنا آسان ہو جائے گا۔

واضح رہے کہ امریکی صدر ڈونلڈ ٹرمپ نے حال ہی میں غزہ میں امن قائم کرنے کے لیے 60 روزہ جنگ بندی کی تجویز دی تھی، جس پر اب باضابطہ طور پر حماس کی طرف سے ابتدائی رضامندی ظاہر کی گئی ہے۔

ادھر غزہ میں جاری تشدد کی لہر تھمنے کا نام نہیں لے رہی۔ غزہ کی وزارتِ صحت کے مطابق گزشتہ 24 گھنٹوں کے دوران اسرائیلی فضائی حملوں میں 138 فلسطینی شہید جبکہ 452 افراد زخمی ہو چکے ہیں۔

یہ صورتحال ایک بار پھر عالمی برادری کو خطے میں پائیدار امن کے لیے اقدامات پر غور کرنے کی یاد دہانی کرا رہی ہے۔