پاکستان کو چین سے لائیو انٹیلی جنس مل رہی تھی، انڈیا کو ساز و سامان وقت پر نہ ملا: بھارتی نائب آرمی چیف کا دعویٰ

 

پاکستان کو چین سے لائیو انٹیلی جنس مل رہی تھی، انڈیا کو ساز و سامان وقت پر نہ ملا: بھارتی نائب آرمی چیف کا دعویٰ

نئی دہلی – انڈیا کے نائب آرمی چیف لیفٹیننٹ جنرل راہول سنگھ نے ایک اہم دعوٰی کرتے ہوئے کہا ہے کہ انڈیا اور پاکستان کے درمیان حالیہ چار روزہ کشیدگی کے دوران نہ صرف پاکستان بلکہ چین اور ترکی بھی براہِ راست پاکستان کی عسکری مدد کر رہے تھے۔

بھارتی نائب آرمی چیف نے "نیو ایج ملٹری ٹیکنالوجیز" کے موضوع پر منعقدہ ایک تقریب میں خطاب کرتے ہوئے کہا:

"پاکستان تو سامنے تھا ہی، لیکن ہمیں چین کی جانب سے بھی سخت مقابلہ درپیش تھا۔ چین پاکستان کو نہ صرف اسلحہ فراہم کر رہا تھا بلکہ ہماری عسکری تنصیبات کی لائیو معلومات بھی دے رہا تھا۔"

ان کے مطابق پچھلے پانچ برسوں میں پاکستان کو ملنے والے 81 فیصد عسکری آلات چین سے فراہم کیے گئے ہیں۔ راہول سنگھ نے مزید کہا کہ ترکی نے بھی پاکستان کو جنگ کے دوران بیراکتر ڈرونز سمیت کئی دیگر دفاعی ٹیکنالوجیز میں مدد فراہم کی، اور ان ڈرونز کے ساتھ ترکی کے ماہرین بھی موجود تھے۔

انڈین فوج کو ساز و سامان میں تاخیر کا سامنا

راہول سنگھ کا کہنا تھا کہ آپریشن "سندور" کے دوران انڈین فوج کو وقت پر اہم ساز و سامان دستیاب نہیں ہو سکا، جس سے آپریشن پر اثر پڑا۔ انہوں نے اس بات کو موجودہ دفاعی حکمت عملی کی ایک بڑی کمزوری قرار دیا۔

چین کی حکمت عملی: ادھار کی چھری سے وار

انہوں نے چین کی 36 سٹریٹیجک حکمت عملیوں کا حوالہ بھی دیا، جن میں ایک اصول یہ ہے: "ادھار کی چھری سے وار کرو" — یعنی دوسرے ممالک کے ذریعے اپنا مفاد حاصل کرو۔

یہ بیان بھارت میں سیکیورٹی، عسکری تیاری، اور جیو پولیٹیکل چیلنجز پر نئی بحث چھیڑ رہا ہے، خاص طور پر جب علاقائی اتحاد تیزی سے مضبوط ہو رہے ہیں۔