اسلام آباد اور راولپنڈی میں بارش کی تباہ کاریاں — نالہ لئی میں خطرے کے سائرن، فوج طلب کرلی گئی

 

اسلام آباد اور راولپنڈی میں بارش کی تباہ کاریاں — نالہ لئی میں خطرے کے سائرن، فوج طلب کرلی گئی

اسلام آباد اور راولپنڈی میں موسلادھار بارش کے بعد خطرے کی گھنٹیاں بج اٹھیں! گزشتہ رات سے جاری شدید بارشوں کے نتیجے میں نالہ لئی میں پانی کی سطح خطرناک حد تک بلند ہوگئی، جس کے بعد ہنگامی صورتحال کے تحت پاک فوج کو طلب کرنے کا فیصلہ کرلیا گیا ہے۔

محکمہ موسمیات کے مطابق اسلام آباد میں 186 ملی میٹر اور راولپنڈی میں 200 ملی میٹر سے زائد بارش ریکارڈ کی گئی ہے۔ نالہ لئی کے کٹاریاں اور گوالمنڈی پوائنٹس پر پانی کی سطح 17 سے 20 فٹ تک جا پہنچی ہے، جس سے نشیبی علاقوں میں سیلابی صورتحال پیدا ہوگئی ہے۔

ضلعی انتظامیہ نے خطرے کے پیشِ نظر راولپنڈی میں ایک دن کی عام تعطیل کا اعلان کیا ہے، اور شہریوں کو غیر ضروری نقل و حرکت سے گریز کرنے کی سخت ہدایات جاری کر دی گئی ہیں۔

ریسکیو اور واسا حکام کا کہنا ہے کہ پانی کا بڑا ریلا نالہ لئی میں گزر رہا ہے، اور شہریوں کو فوری طور پر محفوظ مقامات پر منتقل ہونے کی اپیل کی گئی ہے۔

ادھر گلشن اقبال دھمیال روڈ کے قریب ایک شخص برساتی نالے میں بہہ گیا، جس کی تلاش کے لیے ریسکیو ٹیمیں مصروفِ عمل ہیں۔ آزاد کشمیر کی وادی نیلم، جہلم اور دیگر علاقوں میں بھی شدید بارشوں کے بعد ندی نالوں میں طغیانی آ گئی ہے، اور سیلابی ریلا کئی دیہاتوں کو متاثر کر رہا ہے۔

ایم ڈی واسا نے فوجی حکام سے بھی رابطہ کرلیا ہے تاکہ کسی بھی ہنگامی صورتحال میں فوری مدد حاصل کی جا سکے۔ ضلعی انتظامیہ کی جانب سے شہریوں سے بار بار اپیل کی جا رہی ہے کہ وہ نالہ لئی اور دیگر ندی نالوں کے قریب نہ جائیں اور اپنی جانوں کو محفوظ بنائیں۔

صورتحال لمحہ بہ لمحہ اپڈیٹ کی جا رہی ہے، شہری الرٹ رہیں اور حکومتی ہدایات پر عمل کریں۔