خیبر پختونخوا حکومت کے خلاف تحریکِ عدم اعتماد: اپوزیشن نے رابطے شروع کر دیے، 20 مزید ووٹ درکار

 

خیبر پختونخوا حکومت کے خلاف تحریکِ عدم اعتماد: اپوزیشن نے رابطے شروع کر دیے، 20 مزید ووٹ درکار

پشاور: خیبر پختونخوا اسمبلی میں حکومت مخالف جماعتوں نے وزیر اعلیٰ علی امین گنڈا پور کے خلاف تحریک عدم اعتماد کے لیے مشاورت اور رابطے شروع کر دیے ہیں۔ موجودہ سیاسی منظرنامے میں اپوزیشن جماعتوں کے پاس 53 ارکان کی حمایت موجود ہے، جبکہ تحریکِ عدم اعتماد کی کامیابی کے لیے انہیں مزید 20 ووٹ درکار ہیں۔

صوبائی اسمبلی کے کل 145 ارکان میں سے تحریک انصاف اور اس کے حمایت یافتہ آزاد امیدواروں کو مجموعی طور پر 92 ارکان کی حمایت حاصل ہے، جن میں 58 پی ٹی آئی کے براہ راست اور 34 آزاد ارکان شامل ہیں۔

گورنر خیبر پختونخوا فیصل کریم کنڈی نے عندیہ دیا ہے کہ جیسے ہی اپوزیشن کو ایک بھی عددی برتری حاصل ہوئی، تحریکِ عدم اعتماد پیش کی جائے گی۔ تاہم عوامی نیشنل پارٹی (اے این پی) نے اس عمل میں شامل ہونے سے انکار کر دیا ہے۔ پارٹی سربراہ ایمل ولی خان نے ہارس ٹریڈنگ کی مخالفت کرتے ہوئے کہا کہ اے این پی اس عمل کا حصہ نہیں بنے گی۔

27 جون کو مخصوص نشستوں کی تقسیم کے بعد اپوزیشن کو تقویت ملی ہے، تاہم سیاسی فضا مزید گرم ہو گئی ہے۔ حکومت اور اپوزیشن دونوں اپنی عددی طاقت بڑھانے میں مصروف ہیں۔