نیویارک ٹائمز: غزہ جنگ کے طول کا ذمے دار نیتن یاہو، سیاسی مفاد کو قوم پر ترجیح دی

 

نیویارک ٹائمز: غزہ جنگ کے طول کا ذمے دار نیتن یاہو، سیاسی مفاد کو قوم پر ترجیح دی

امریکی جریدے نیویارک ٹائمز نے ایک چونکا دینے والی رپورٹ میں دعویٰ کیا ہے کہ غزہ میں جاری جنگ کے طویل ہونے کا براہ راست ذمے دار اسرائیلی وزیر اعظم بنیامین نیتن یاہو ہے، جنہوں نے سیاسی مفادات کو انسانی زندگیوں پر ترجیح دی۔

رپورٹ کے مطابق، اپریل 2024ء میں جب یرغمالیوں کی رہائی کے بدلے جنگ بندی کی پیش کش کی گئی تو نیتن یاہو نے اس پر ابتدائی طور پر رضامندی ظاہر کی تھی۔ مگر جب یہ اطلاع ان کی مخلوط حکومت میں شامل انتہاپسند وزیر خزانہ سموٹرچ تک پہنچی، تو اس نے سخت ردعمل دیتے ہوئے اعلان کیا کہ اگر جنگ بندی ہوئی تو وہ حکومت چھوڑ دے گا۔

نیویارک ٹائمز نے انکشاف کیا ہے کہ نیتن یاہو نے صرف اپنی حکومت بچانے کی خاطر جنگ بندی کی پیش کش مسترد کر دی۔

رپورٹ میں مزید بتایا گیا ہے کہ اگر جنگ بندی ہو جاتی اور اس کے نتیجے میں نیتن یاہو انتخابات ہار جاتے، تو ان کے خلاف 2020ء سے جاری کرپشن کیسز دوبارہ کھل جاتے۔ اس ممکنہ انجام سے بچنے کے لیے نیتن یاہو نے جنگ کو طول دیا، جس کے باعث ہزاروں بے گناہ فلسطینی شہید اور لاکھوں بے گھر ہو چکے ہیں۔

بین الاقوامی مبصرین نے اس انکشاف کو انسانی حقوق کی بدترین خلاف ورزی قرار دیا ہے اور مطالبہ کیا ہے کہ اقوامِ متحدہ اور عالمی عدالتیں نیتن یاہو کے خلاف قانونی کارروائی کریں۔