بھارت میں ہونے والے ہاکی ایشیا کپ میں پاکستان کی شرکت کے امکانات روشن

 

بھارت میں ہونے والے ہاکی ایشیا کپ میں پاکستان کی شرکت کے امکانات روشن

ایشیا کپ ہاکی ٹورنامنٹ 2025 کے لیے پاکستان کی بھارت میں شرکت کے امکانات روشن ہوتے جا رہے ہیں۔ بھارتی میڈیا اور سرکاری ذرائع کی جانب سے مثبت اشارے سامنے آئے ہیں، جس سے یہ ظاہر ہوتا ہے کہ پاکستان ہاکی ٹیم کی شرکت کی راہ میں حائل رکاوٹیں ختم ہوتی جا رہی ہیں۔

بھارتی سرکاری خبر رساں ادارے کے مطابق، بھارتی وزارتِ کھیل کے ذرائع کا کہنا ہے کہ پاکستان کو ایونٹ میں شرکت سے نہیں روکا جائے گا۔ ذرائع نے مزید کہا کہ "ہم بین الاقوامی ٹورنامنٹس میں پاک-بھارت مقابلوں کے خلاف نہیں ہیں، اور ان میچز سے پیچھے ہٹنا عالمی کھیلوں کے تقاضوں کے منافی ہے۔"

بھارتی اخبار انڈیا ٹوڈے نے دعویٰ کیا ہے کہ بھارت کی وزارتِ داخلہ اور وزارتِ خارجہ دونوں نے پاکستان کی ٹیم کو ایشیا کپ میں شرکت کی کلیئرنس دے دی ہے۔

واضح رہے کہ ہاکی ایشیا کپ بھارت میں 27 اگست سے 7 ستمبر 2025 تک منعقد کیا جائے گا۔

تاہم، پاکستان ہاکی فیڈریشن (PHF) کی جانب سے یہ واضح کیا گیا ہے کہ ٹیم کی شرکت حکومت پاکستان کی اجازت سے مشروط ہوگی۔ فیڈریشن کے سیکریٹری جنرل رانا مجاہد نے قبل ازیں بیان دیا تھا کہ "اگر حکومت نے اجازت دی تو ہی بھارت میں ایشیاء کپ کھیلیں گے۔"

دوسری جانب، پاکستان حکومت کی جانب سے اس معاملے پر تاحال کوئی باقاعدہ ردعمل سامنے نہیں آیا۔

ایشیا کپ میں پاکستان کی شرکت نہ صرف دونوں ملکوں کے درمیان کھیلوں کے تعلقات کو فروغ دے سکتی ہے بلکہ عالمی ہاکی کے فروغ میں بھی مثبت کردار ادا کرے گی۔