پاکستان پوسٹ میں 4 ارب روپے کے خلافِ ضابطہ اخراجات کا انکشاف

 

پاکستان پوسٹ میں 4 ارب روپے کے خلافِ ضابطہ اخراجات کا انکشاف

اسلام آباد: پبلک اکاؤنٹس کمیٹی کے اجلاس میں پاکستان پوسٹ کی جانب سے 4 ارب روپے کے خلافِ ضابطہ اخراجات کا انکشاف ہوا ہے۔

یہ اجلاس کمیٹی کے چیئرمین جنید اکبر خان کی زیر صدارت ہوا، جس میں وزارت مواصلات کی آڈٹ رپورٹ برائے مالی سال 2023-24 پر غور کیا گیا۔

آڈٹ حکام نے بتایا کہ پاکستان پوسٹ نے مختلف ذرائع سے حاصل کردہ رقوم قومی خزانے میں جمع کروانے کے بجائے خود خرچ کر دیں۔ یہ اخراجات ملک بھر کے 37 ڈاک خانوں میں کیے گئے جو قواعد و ضوابط کے منافی ہیں۔

رپورٹ کے مطابق ان رقوم سے منی آرڈرز اور ویسٹرن یونین کی ادائیگیاں کی گئیں۔

سیکریٹری مواصلات نے وضاحت دی کہ اس وقت ادائیگیوں کا مؤثر نظام موجود نہیں تھا، اس لیے یہ اقدامات ناگزیر تھے، تاہم اب نظام بہتر بنا دیا گیا ہے۔

آڈٹ حکام نے اس مؤقف کی تردید کرتے ہوئے کہا کہ یہ وضاحت درست نہیں، کیونکہ اب بھی کئی ڈاک خانوں میں یہی عمل جاری ہے۔