ریلوے کا کرایوں میں ایک بار پھر اضافہ، دو ہفتوں میں دوسری مرتبہ مہنگائی کا جھٹکا

 

ریلوے کا کرایوں میں ایک بار پھر اضافہ، دو ہفتوں میں دوسری مرتبہ مہنگائی کا جھٹکا

پاکستان ریلوے نے مسافر ٹرینوں کے کرایوں میں 2 فیصد اضافہ کر دیا ہے۔ اس سلسلے میں باقاعدہ نوٹیفکیشن بھی جاری کر دیا گیا ہے، جس کے مطابق یہ فیصلہ فوری طور پر نافذ العمل ہو گا۔

قابلِ ذکر بات یہ ہے کہ یہ اضافہ صرف دو ہفتوں کے دوران دوسری مرتبہ کیا گیا ہے۔ اس سے قبل 18 جون کو کرایوں میں 3 فیصد اضافہ کیا گیا تھا، جس کے بعد موجودہ اضافہ عوام پر مزید مالی بوجھ کا سبب بنے گا۔

ریلوے حکام کے مطابق، ڈیزل کی قیمتوں میں مسلسل اضافے سے پاکستان ریلوے کو شدید مالی دباؤ کا سامنا ہے، جس کا بوجھ اب مسافر اور مال بردار دونوں اقسام کی ٹرینوں پر منتقل کیا جا رہا ہے۔

حکام کا کہنا ہے کہ ادارہ کوشش کر رہا ہے کہ مسافر ٹرینوں پر کم اور مال بردار ٹرینوں پر زیادہ بوجھ ڈالا جائے تاکہ عام عوام کو کم سے کم متاثر کیا جا سکے۔ اس حوالے سے ریلوے کی کمیٹی جلد مزید فیصلے کرے گی کہ آئندہ کرایوں میں مزید کتنا اضافہ ناگزیر ہے۔