وزیراعظم کا ڈیجیٹل معیشت کی رفتار دوگنی کرنے کا فیصلہ: ادائیگیوں کو آسان اور شفاف بنانے کی ہدایت

 

وزیراعظم کا ڈیجیٹل معیشت کی رفتار دوگنی کرنے کا فیصلہ: ادائیگیوں کو آسان اور شفاف بنانے کی ہدایت

اسلام آباد: پاکستان میں ڈیجیٹل اور کیش لیس معیشت کی جانب پیش قدمی جاری ہے۔ وزیراعظم شہباز شریف نے تمام متعلقہ اداروں کو ہدایت کی ہے کہ ڈیجیٹل معیشت سے متعلق تمام اہداف کو دگنا کیا جائے تاکہ ادائیگیوں کا نظام زیادہ شفاف، آسان اور جدید بنایا جا سکے۔

جمعرات کو وزیراعظم کی زیر صدارت منعقدہ اجلاس میں کیش لیس اور ڈیجیٹل معیشت پر پیش رفت کا جائزہ لیا گیا۔ اجلاس میں وزیراعظم کو بتایا گیا کہ اسٹیٹ بینک تاجروں کے لیے ڈیجیٹل ادائیگیوں کے طریقہ کار کو سہل بنانے پر کام کر رہا ہے۔

وزیراعظم نے زور دیا کہ شہریوں اور کاروباری اداروں کے درمیان ادائیگیوں کے عمل کو ڈیجیٹل سسٹمز کے ذریعے مزید آسان بنایا جائے اور عوامی آگاہی میں اضافہ کیا جائے تاکہ زیادہ سے زیادہ لوگ اس نظام سے مستفید ہو سکیں۔

وزیراعظم کو بریفنگ میں بتایا گیا کہ:

موبائل فون ایپلیکیشنز کے ذریعے ڈیجیٹل ادائیگیوں کے صارفین کی تعداد 95 ملین سے بڑھا کر 120 ملین تک لے جانے کا ہدف ہے۔

کیو آر کوڈ استعمال کرنے والے تاجروں کی تعداد کو 0.9 ملین سے 2 ملین تک لے جایا جائے گا۔

ڈیجیٹل ادائیگیوں کی مالیت کو 7.5 بلین روپے سے بڑھا کر 12 بلین روپے تک کیا جائے گا۔

چھوٹے کاروباروں کی شمولیت کے لیے آسان ڈیجیٹل پیکج متعارف کروائے جائیں گے۔

اجلاس میں ہدایت کی گئی کہ تمام کمیٹیاں اسٹیک ہولڈرز کے ساتھ مشاورت کے بعد قابلِ عمل تجاویز جلد پیش کریں تاکہ کیش لیس اکانومی کا ویژن حقیقت میں بدلا جا سکے۔