پنجاب میں شدید بارشوں سے تباہی، 55 افراد جاں بحق — دریائے سواں، چکوال اور راولپنڈی میں طغیانی

 

 پنجاب میں شدید بارشوں سے تباہی، 55 افراد جاں بحق — دریائے سواں، چکوال اور راولپنڈی میں طغیانی

پنجاب کے مختلف شہروں میں گزشتہ 24 گھنٹوں کے دوران موسلادھار بارش اور طغیانی کے نتیجے میں قیمتی جانوں کا نقصان ہوا۔ مختلف حادثات میں 55 افراد جاں بحق ہوچکے ہیں جبکہ درجنوں زخمی ہیں۔

چکوال میں ریکارڈ 450 ملی میٹر بارش ہوئی جس کے بعد ندی نالے بپھر گئے، سڑکیں بہہ گئیں اور متعدد علاقے زیر آب آ گئے۔ کوہالی پل کا ایک حصہ بھی پانی کے ریلے میں بہہ گیا جبکہ تاریخی کٹاس راج مندر بھی بارش کے پانی میں ڈوب گیا۔

راولپنڈی اور اسلام آباد میں بھی 240 ملی میٹر بارش ریکارڈ کی گئی، جس کے بعد دریائے سواں میں شدید طغیانی آگئی، قریبی آبادیاں زیر آب آنے سے شہریوں کو محفوظ مقامات پر منتقل ہونے کی ہدایات جاری کر دی گئیں۔

نالہ لئی میں پانی کی سطح مسلسل بلند ہے جبکہ نشیبی بستیاں مکمل طور پر پانی میں گھر چکی ہیں۔ بارش کے باعث کئی گھروں میں پانی داخل ہوگیا اور معمولات زندگی مفلوج ہو چکے ہیں۔

ریسکیو ادارے اور ضلعی انتظامیہ ہنگامی بنیادوں پر امدادی کاموں میں مصروف ہیں اور پانی کے نکاس کے بعد چکوال شہر میں زندگی معمول پر آ رہی ہے۔

ضلعی انتظامیہ نے شہریوں سے اپیل کی ہے کہ ندی نالوں سے دور رہیں اور کسی بھی ایمرجنسی کی صورت میں 1122 پر فوری اطلاع دیں۔