یکطرفہ محبت میں انتقام: خاتون کی 21 بم دھمکیاں بھارت میں ہنگامہ بن گئیں

 

یکطرفہ محبت میں انتقام: خاتون کی 21 بم دھمکیاں بھارت میں ہنگامہ بن گئیں

بھارتی ریاست تامل ناڈو سے تعلق رکھنے والی 30 سالہ روبوٹکس انجینئر خاتون نے یکطرفہ محبت میں 21 مقامات کو بم سے اُڑانے کی جعلی دھمکیاں دے کر پورے ملک کو خوف میں مبتلا کر دیا۔

بھارتی میڈیا رپورٹس کے مطابق رینی جوشیلڈا نامی خاتون ایک بڑی ٹیک فرم میں سینئر کنسلٹنٹ کے طور پر کام کرتی ہیں۔ پولیس کے مطابق، رینی ایک ایسے شخص سے محبت کرتی تھیں جس نے حال ہی میں کسی اور سے شادی کرلی۔ یہ خبر ملتے ہی خاتون کا رویہ مبینہ طور پر انتقامی ہو گیا۔

پولیس نے بتایا کہ رینی نے 12 مختلف ریاستوں — جن میں گجرات، مہاراشٹرا، دہلی اور تامل ناڈو شامل ہیں — کے اسکولوں، اسپتالوں اور دیگر عوامی مقامات کو بم دھماکوں کی دھمکی آمیز جعلی ای میلز بھیجیں۔

یہ ای میلز نہ صرف شہریوں میں خوف و ہراس کا باعث بنیں بلکہ پولیس فورس کو بھی گمراہ کرتی رہیں، کیونکہ ان میں رینی نے اس شخص کا نام بھی شامل کر دیا تھا جس نے اس کی محبت ٹھکرائی تھی۔

مزید تفتیش میں انکشاف ہوا کہ خاتون نے اپنی شناخت چھپانے کے لیے جعلی ای میلز، وی پی این اور ورچوئل نمبرز کا سہارا لیا، لیکن ایک معمولی غلطی نے سب کچھ بدل دیا — رینی ایک ہی ڈیوائس پر اپنی اصلی اور جعلی ای میلز میں لاگ ان ہوگئیں، جس سے ان کا آئی پی ایڈریس ٹریس کر لیا گیا۔

بھارتی پولیس نے خاتون کو گرفتار کر لیا ہے اور مزید تفتیش جاری ہے۔