قیامت خیز بارشیں، کلاؤڈ برسٹ اور سیلابی ریلے – خیبرپختونخوا میں تباہی، 25 جاں بحق، درجنوں زخمی

 قیامت خیز بارشیں، کلاؤڈ برسٹ اور سیلابی ریلے – خیبرپختونخوا میں تباہی، 25 جاں بحق، درجنوں زخمی

ملک بھر میں مون سون کے نئے اور طاقتور اسپیل کا دھواں دھار آغاز ہوچکا ہے، جس نے خیبرپختونخوا کے مختلف اضلاع کو شدید متاثر کیا۔ صوابی میں کلاؤڈ برسٹ اور سیلابی ریلوں نے تباہی مچا دی، جہاں مکانات گرنے اور ریلوں میں بہہ جانے سے 25 افراد جاں بحق اور 35 زخمی ہوگئے، جب کہ 40 افراد تاحال لاپتا ہیں۔

بارش اور سیلاب سے درجنوں مکانات اور دکانیں تباہ ہوگئیں، لوگ ملبے تلے دب گئے، متعدد خاندان گھروں کی چھتوں پر محصور ہوگئے۔ سوات، مینگورہ، پشاور اور ایبٹ آباد میں ندی نالوں میں طغیانی اور بارش کا پانی گھروں میں داخل ہوگیا۔ شاہراہ قراقرم اور متعدد مقامی سڑکیں لینڈ سلائیڈنگ اور بارشوں کے باعث بند ہوگئیں، جس سے امدادی ٹیموں کو مشکلات کا سامنا ہے۔

ڈی سی صوابی نصر اللہ خان کے مطابق، متاثرہ علاقوں میں خواتین اور بچوں سمیت ہلاکتوں کی تصدیق ہوئی ہے۔ دالوڑی بالا اور سرکوئی پایاں میں مکانات گرنے سے کئی لوگ جاں بحق اور زخمی ہوئے۔ پاک فوج کے امدادی ہیلی کاپٹرز اور مقامی ریسکیو ٹیمیں متاثرہ دیہات میں پہنچ چکی ہیں اور لاشوں و زخمیوں کو نکالنے کا عمل جاری ہے۔

نیشنل ڈیزاسٹر مینجمنٹ اتھارٹی (NDMA) کے مطابق حالیہ مون سون بارشوں کے دوران اب تک 660 افراد جاں بحق ہو چکے ہیں، جن میں سے سب سے زیادہ 392 اموات خیبرپختونخوا میں رپورٹ ہوئی ہیں۔ پنجاب، سندھ، بلوچستان، گلگت بلتستان، آزاد کشمیر اور اسلام آباد بھی اس تباہی کی لپیٹ میں آئے ہیں۔

ماہرین کے مطابق، مسلسل بارشوں اور لینڈ سلائیڈنگ نے بجلی اور مواصلاتی نظام کو درہم برہم کر دیا ہے جبکہ متاثرہ علاقوں میں خوراک اور ادویات کی شدید قلت پیدا ہوگئی ہے۔