بھارت کو بیانیے کی جنگ میں شکست دی، ہماری سچائی دنیا کے سامنے آئی: بلاول بھٹو

 

بھارت کو بیانیے کی جنگ میں شکست دی، ہماری سچائی دنیا کے سامنے آئی: بلاول بھٹو

پاکستان پیپلز پارٹی کے چیئرمین بلاول بھٹو زرداری نے کہا ہے کہ پاکستان نے سفارتی اور بیانیاتی محاذ پر بھارت کو شکست دی، اور پوری دنیا کے سامنے یہ ثابت کیا کہ سچائی پاکستان کے ساتھ ہے۔

اسلام آباد میں “میٹ دی پریس” سے خطاب کرتے ہوئے بلاول بھٹو کا کہنا تھا کہ پاکستان کے میڈیا نے دشمن کے جھوٹے بیانیے کو شکست دی، اور دنیا کو بتایا کہ حقیقت کیا ہے۔ انہوں نے کہا کہ وہ پاکستانی میڈیا کے کردار پر فخر محسوس کرتے ہیں۔

ان کا کہنا تھا کہ بھارت کی طرف سے لگائے گئے الزامات بے بنیاد تھے، اور پاکستان نے نہ صرف ان الزامات کو مسترد کیا بلکہ وزیرِ اعظم کے مطالبے پر بین الاقوامی تحقیقات کا دروازہ بھی کھولا، جس سے ہماری ساکھ مزید مضبوط ہوئی۔

بلاول نے کہا کہ بھارتی میڈیا جھوٹا بیانیہ گھڑتا رہا جبکہ پاکستان نے شفافیت کے ساتھ اپنا مؤقف پیش کیا۔ ان کے مطابق بھارت کو امید نہیں تھی کہ پاکستان اتنی مؤثر مزاحمت کرے گا، یہاں تک کہ جب بھارت کے جہاز مار گرائے گئے تو وہ تسلیم کرنے سے بھی گریزاں تھا۔

انہوں نے کہا کہ بھارت کی جانب سے سیز فائر کی بات کرنا اس کی کمزوری کو ظاہر کرتا ہے، جبکہ پاکستان نے کشمیر کے محاذ پر بھی اہم سفارتی کامیابیاں حاصل کیں، اور دنیا اب اس مسئلے کو نئی نظر سے دیکھ رہی ہے۔

چیئرمین پیپلز پارٹی نے کہا کہ بھارت کی کوشش تھی کہ پاکستان کو دہشت گرد ریاست قرار دلایا جائے، مگر پاکستان نے فیٹف سمیت تمام محاذوں پر کامیابی حاصل کی اور امریکا جیسے اہم اتحادی بھی پاکستان کو دہشتگردی کے خلاف جنگ کا قدرتی شراکت دار مانتے ہیں۔

بلاول بھٹو نے اس بات پر زور دیا کہ بھارت کی جانب سے پانی روکنے کی دھمکیاں ناقابل قبول ہیں، اور سندھ طاس معاہدے کے تحت پاکستان کو اپنے دریائی حقوق ضرور حاصل ہوں گے۔

آخر میں انہوں نے کہا کہ موجودہ آرمی چیف کا دورہ جنگی کامیابی کی علامت ہے، اور اس نے بھارت کے تمام عزائم خاک میں ملا دیے۔ ان کا کہنا تھا کہ اب پاکستان کو معاشی میدان میں بھی دشمنوں کو شکست دینی ہے۔