ٹیکساس میں فلیش فلڈ کا المناک حادثہ: گرلز کیمپ کی درجنوں بچیاں اور کونسلرز ہلاک یا لاپتہ

 

ٹیکساس میں فلیش فلڈ کا المناک حادثہ: گرلز کیمپ کی درجنوں بچیاں اور کونسلرز ہلاک یا لاپتہ

امریکی ریاست ٹیکساس کے وسطی علاقے میں 4 جولائی 2025ء کو آنے والے اچانک اور شدید فلیش فلڈ نے مقامی گرلز سمر کیمپ "کیمپ میسٹک" کو تباہی سے دوچار کر دیا۔ اس المناک واقعے میں درجنوں نوعمر لڑکیاں، نوجوان کونسلرز اور اسٹاف ارکان ہلاک یا لاپتہ ہو چکے ہیں۔

واشنگٹن پوسٹ کی رپورٹ کے مطابق، شدید بارش کے بعد ندی میں آنے والی طغیانی نے محض چند منٹوں میں کیمپ کے بیشتر کیبن، خیمے اور کھیل کے میدانوں کو اپنی لپیٹ میں لے لیا۔ یہ کیمپ دریائے گوادالوپ کے کنارے واقع تھا اور کئی دہائیوں سے نوجوان لڑکیوں کی تربیت کا مرکز تھا۔

ایک کونسلر نے بتایا:

"ہمارے پاس ایک ہیڈ لیمپ تھا اور 16 چھوٹی لڑکیاں تھیں۔ ہم اندھیرے میں ہاتھ تھام کر پانی کے اندر چلتے رہے۔ بس دعائیں کرتے رہے۔"

زندہ بچ جانے والوں کے بیانات کے مطابق، خاتون کونسلرز نے بہادری کی انتہا کرتے ہوئے 6 سے 12 سالہ لڑکیوں کو بچانے کی کوششیں کیں۔ کچھ نے تو لڑکیوں کے ہاتھوں پر مارکر سے ان کے نام اور ایمرجنسی نمبر بھی لکھ دیے تاکہ اگر وہ بہہ جائیں تو ان کی شناخت ہو سکے۔

امدادی ٹیمیں علاقے میں تاحال لاپتہ افراد کی تلاش جاری رکھے ہوئے ہیں، جبکہ پورے امریکہ میں اس حادثے پر غم و سوگ کی فضا چھائی ہوئی ہے۔